Arooz is now on the App Store, for iPhone and iPad. Download →

All poetry

من بھی شاعر کی طرح تن بھی غزل جیسا ہے

Qaisar Siddiqi (1937–2018)

من بھی شاعر کی طرح تن بھی غزل جیسا ہے

یہ ترے روپ کا درپن بھی غزل جیسا ہے

ریشمی چوڑیاں ایسی کہ غزل کے مصرعے

یہ کھنکتا ہوا کنگن بھی غزل جیسا ہے

ان لچکتی ہوئی زلفوں میں ہے گوکل کا سماں

یہ مہکتا ہوا ساون بھی غزل جیسا ہے

لوگ گیتوں کی طرح تو بھی رسیلی ہے مگر

میری سجنی ترا ساجن بھی غزل جیسا ہے

میرے جذبات کی شوخی بھی غزل جیسی ہے

میرے احساس کا بچپن بھی غزل جیسا ہے

دیکھ کر تجھ کو غزل کیسے نہ لکھے قیصرؔ

تو غزل جیسی ہے یوون بھی غزل جیسا ہے