کیوں نہ افسانۂ غم کیف کا عنواں ٹھہرے

کیوں نہ افسانۂ غم کیف کا عنواں ٹھہرے

شدت درد ہی جب درد کا درماں ٹھہرے

جس جگہ ہم سا کوئی چاک گریباں ٹھہرے

شوق سے آ کے وہاں فصل بہاراں ٹھہرے

اس کے دامن کی طرف ہاتھ بڑھاؤں کیسے

جس کے دامن کی مہک شعلگیٔ جاں ٹھہرے

منزلیں آتی ہیں اور آ کے گزر جاتی ہیں

دیکھیے جا کے کہاں قافلۂ جاں ٹھہرے

پچھلے وعدے جو نہیں یاد تو کیا بات ہوئی

پھر کوئی عہد وفا پھر کوئی پیماں ٹھہرے

آپ کو دیکھوں تو ہو دور مری تشنہ لبی

آپ آ جائیں تو جذبات کا طوفاں ٹھہرے

شوخیٔ دست صبا سے تو کوئی کچھ نہ کہے

میرے سر تہمت گیسوئے پریشاں ٹھہرے

kyun na afsana-e-gham kaif ka unwan thahre

shiddat-e-dard hi jab dard ka darman thahre

jis jagah ham sa koi chak-e-gareban thahre

shauq se a ke wahan fasl-e-baharan thahre

us ke daman ki taraf hath barhaun kaise

jis ke daman ki mahak sholagi-e-jan thahre

manzilen ati hain aur a ke guzar jati hain

dekhiye ja ke kahan qafila-e-jan thahre

pichhle waade jo nahin yad to kya bat hui

phir koi ahd-e-wafa phir koi paiman thahre

ap ko dekhun to ho dur miri tishna labi

ap a jaen to jazbat ka tufan thahre

shokhi-e-dast-e-saba se to koi kuchh na kahe

mere sar tohmat-e-gesu-e-pareshan thahre