عالم بے چہرگی میں کون کس کا آشنا

عالم بے چہرگی میں کون کس کا آشنا

آج کا ہر لفظ ہے مفہوم سے نا آشنا

کون ہوتا ہے زمانے میں کسی کا آشنا

لوگ ہونا چاہتے ہیں خود زمانہ آشنا

سوچتا ہوں کون سی منزل ہے یہ ادراک کی

ذرہ ذرہ آشنا ہے پتا پتا آشنا

چاٹ جاتی ہے جنہیں سورج کی پیاسی روشنی

کاش ہو جائیں کسی دن وہ بھی دریا آشنا

تشنگی آئی سرابوں سے گزر کر آب تک

ساحل دریا مگر اب تک ہے صحرا آشنا

ذوق خود بینی کی تسکین انا کے واسطے

کتنے ہی نا آشناؤں کو بنایا آشنا

کاش ہو جائے تری آنکھوں پہ خوابوں کا نزول

کاش ہو جائے ترا دل بھی تمنا آشنا

کون پہچانے گا ہم کو کون پوچھے گا مزاج

کون ہے اپنے سوا قیصرؔ ہمارا آشنا

alam-e-be chehragi mein kaun kis ka ashna

aj ka har lafz hai mafhum se na ashna

kaun hota hai zamane mein kisi ka ashna

log hona chahte hain khud zamana ashna

sochta hun kaun si manzil hai ye idrak ki

zarra zarra ashna hai patta patta ashna

chat jati hai jinhen suraj ki pyasi raushni

kash ho jaen kisi din wo bhi dariya ashna

tishnagi ai sarabon se guzar kar ab tak

sahil-e-dariya magar ab tak hai sahra ashna

zauq-e-khud bini ki taskin-e-ana ke waste

kitne hi na ashnaon ko banaya ashna

kash ho jae tiri ankhon pe khwabon ka nuzul

kash ho jae tira dil bhi tamanna ashna

kaun pahchanega ham ko kaun puchhega mizaj

kaun hai apne siwa qaisar hamara ashna