رہ حیات کو آساں بنا سکو تو چلو

رہ حیات کو آساں بنا سکو تو چلو

ہمارا ساتھ اگر تم نبھا سکو تو چلو

نگاہ ناز کا جادو جگا سکو تو چلو

قدم قدم پہ نئے گل کھلا سکو تو چلو

رہ وفا میں غموں کے بہت اندھیرے ہیں

ہر ایک حال میں تم مسکرا سکو تو چلو

مرے خیال کی دنیا ہے مجھ پہ چھائی ہوئی

مرے خیال کی دنیا پہ چھا سکو تو چلو

بڑے خلوص سے چہرے فریب دیتے ہیں

نگاہ بن کے دلوں میں سما سکو تو چلو

سجا کے رات کے ماتھے پہ چاند کا جھومر

مجھے اندھیرے میں رستہ دکھا سکو تو چلو

نئی ہے راہ تو قیصرؔ نئی نگاہ بھی ہو

نئی حیات کے نغمے سنا سکو تو چلو

rah-e-hayat ko asan bana sako to chalo

hamara sath agar tum nibha sako to chalo

nigah-e-naz ka jadu jaga sako to chalo

qadam qadam pe nae gul khula sako to chalo

rah-e-wafa mein ghamon ke bahut andhere hain

har ek hal mein tum muskura sako to chalo

mire khayal ki duniya hai mujh pe chhai hui

mire khayal ki duniya pe chha sako to chalo

bare khulus se chehre fareb dete hain

nigah ban ke dilon mein sama sako to chalo

saja ke rat ke mathe pe chand ka jhumar

mujhe andhere mein rasta dikha sako to chalo

nai hai rah to qaisar nai nigah bhi ho

nai hayat ke naghme suna sako to chalo