یہ کیسے جانتا گر شہر میں آیا نہیں ہوتا

یہ کیسے جانتا گر شہر میں آیا نہیں ہوتا

یہاں دیوار ہوتی ہے مگر سایہ نہیں ہوتا

رسالت کی بنا گر جھوٹ پر رکھی گئی ہوتی

رسولوں کو بھی تو دنیا نے جھٹلایا نہیں ہوتا

یہ خواب صبح کیا کرتے تمنا کی حنا بندی

اگر تاریخ نے اپنے کو دہرایا نہیں ہوتا

جو امرت چھوڑ کر ہم لوگ بھی وش پان کر لیتے

تو اپنے خون میں یہ سانپ لہرایا نہیں ہوتا

میں اپنے قتل کا اس پر کبھی شک بھی نہیں کرتا

اگر وہ مسکراتے وقت شرمایا نہیں ہوتا

اگر کچھ کام آتی اصطلاح ساغر و مینا

تو میری تشنگی نے مجھ کو بہکایا نہیں ہوتا

جناب میرؔ روتے ہیں تو قیصرؔ شوق سے روئیں

ہمارے عہد میں اب کوئی ہم سایہ نہیں ہوتا

ye kaise janta gar shahr mein aya nahin hota

yahan diwar hoti hai magar saya nahin hota

risalat ki bana gar jhut par rakhi gai hoti

rasulon ko bhi to duniya ne jhutlaya nahin hota

ye khwab-e-subh kya karte tamanna ki hina bandi

agar tarikh ne apne ko dohraya nahin hota

jo amrit chhor kar ham log bhi wash pan kar lete

tu apne khun mein ye sanp lahraya nahin hota

main apne qatl ka us par kabhi shak bhi nahin karta

agar wo muskurate waqt sharmaya nahin hota

agar kuchh kam ati istilah-e-saghar-o-mina

tu meri tishnagi ne mujh ko bahkaya nahin hota

janab-e-mir rote hain to qaisar shauq se roen

hamare ahd mein ab koi ham saya nahin hota