اپنا انکار کر چکا ہوں میں

اپنا انکار کر چکا ہوں میں

کار دشوار کر چکا ہوں میں

یعنی وحشت میں آپ ہی اپنے

سائے پر وار کر چکا ہوں میں

جو کہانی میں مرکزی ٹھہرے

وہ بھی کردار کر چکا ہوں میں

بے ثباتی پہ آنکھ سے گریہ

حسب درکار کر چکا ہوں میں

اب نصیحت کا فائدہ ہی نہیں

عشق آزار کر چکا ہوں میں

اوڑھ کر ہجر تیرا اے فرحتؔ

خود کو بیمار کر چکا ہوں میں

apna inkar kar chuka hun main

kar dushwar kar chuka hun main

yaani wahshat mein ap hi apne

sae par war kar chuka hun main

jo kahani mein markazi thahre

wo bhi kirdar kar chuka hun main

be sabati pe ankh se girya

hasb darkar kar chuka hun main

ab nasihat ka faida hi nahin

ishq azar kar chuka hun main

orh kar hijr tera ai farhat

khud ko bimar kar chuka hun main