Arooz is now on the App Store, for iPhone and iPad. Download →

All poetry

یہ بھلا کیسی انکساری ہے

Umar Farhat (b. 1986)

یہ بھلا کیسی انکساری ہے

زندگی خاک میں گزاری ہے

اس نے جھیلا ہے یہ پہاڑ سا دن

ہم نے آنکھوں میں شب گزاری ہے

رات کیسے مری بسر ہوگی

جب کہ یہ شام اتنی بھاری ہے

دل کے جنگل میں ہیں اکیلے ہم

اس پہ یہ رات بھی شکاری ہے

بعد تیرے سمجھ نہیں آتا

کس طرح کی یہ اشک باری ہے

جس کو دیکھوں اسے پکارتا ہوں

مجھ پہ اک اسم کی خماری ہے

تم جنہیں اشک کہہ رہے ہو عمرؔ

وہ محبت کی ریز گاری ہے