صحرائے زندگی کے لئے نور دیدہ ہوں

صحرائے زندگی کے لئے نور دیدہ ہوں

کانٹا سہی مگر میں گل نو دمیدہ ہوں

مجھ پر کھلا ہے عہد بہار و خزاں کا راز

میں اک حسین پھول کا رنگ پریدہ ہوں

تجھ کو بھی زندگی نے دیا درد بے کراں

میں بھی غم حیات کا لذت چشیدہ ہوں

تجھ سے مرا تعلق خاطر ہے دائمی

تو ہے اگر غزل تو میں تیرا قصیدہ ہوں

دنیا مٹی ہوئی ہے مرے اختصار پر

دوشیزۂ حیات کی زلف بریدہ ہوں

تم کو مرے تغافل بے جا کا ہے گلہ

میں کچھ دنوں سے خود سے بھی دامن کشیدہ ہوں

میں سوچتا ہوں مجھ پہ یہ تہمت ہے کس لئے

اب وہ بھی کہہ رہے ہیں کہ میں برگزیدہ ہوں

کانٹوں سے کھیلتا ہوں گلستان عشق میں

پرویزؔ فرط شوق میں دامن دریدہ ہوں

sahra-e-zindagi ke liye nur-e-dida hun

kanta sahi magar main gul-e-nau damida hun

mujh par khula hai ahd-e-bahar-o-khizan ka raz

main ik hasin phul ka rang-e-parida hun

tujh ko bhi zindagi ne diya dard-e-be karan

main bhi gham-e-hayat ka lazzat chashida hun

tujh se mira taalluq-e-khatir hai daimi

tu hai agar ghazal to main tera qasida hun

duniya mitti hui hai mire ikhtisar par

doshiza-e-hayat ki zulf-e-burida hun

tum ko mire taghaful-e-be ja ka hai gila

main kuchh dinon se khud se bhi daman kashida hun

main sochta hun mujh pe ye tohmat hai kis liye

ab wo bhi kah rahe hain ke main barguzeda hun

kanton se khelta hun gulistan-e-ishq mein

parwez fart-e-shauq mein daman darida hun