ہنوز زندگیٔ تلخ کا مزہ نہ ملا

ہنوز زندگیٔ تلخ کا مزہ نہ ملا

کمال صبر ملا صبر آزما نہ ملا

مری بہار و خزاں جس کے اختیار میں ہے

مزاج اس دل بے اختیار کا نہ ملا

ہوا کے دوش پہ جاتا ہے کاروان نفس

عدم کی راہ میں کوئی پیادہ پا نہ ملا

بس ایک نقطۂ فرضی کا نام ہے کعبہ

کسی کو مرکز تحقیق کا پتہ نہ ملا

امید و بیم نے مارا مجھے دو راہے پر

کہاں کے دیر و حرم گھر کا راستہ نہ ملا

بجز ارادہ پرستی خدا کو کیا جانے

وہ بد نصیب جسے بخت نارسانہ ملا

نگاہ یاسؔ سے ثابت ہے سعئ لا حاصل

خدا کا ذکر تو کیا بندۂ خدا نہ ملا

hanoz zindagi-e-talkh ka maza na mila

kamal-e-sabr mila sabr azma na mila

miri bahar-o-khizan jis ke ikhtiyar mein hai

mizaj is dil-e-be ikhtiyar ka na mila

hawa ke dosh pe jata hai karwan-e-nafas

adam ki rah mein koi piyada pa na mila

bas ek nuqta-e-farzi ka nam hai kaaba

kisi ko markaz-e-tahqiq ka pata na mila

ummid-o-bim ne mara mujhe do rahe par

kahan ke dair-o-haram ghar ka rasta na mila

bajuz irada parasti khuda ko kya jane

wo bad nasib jise bakht-e-narasana mila

nigah yas se sabit hai sai-e-la hasil

khuda ka zikr to kya banda-e-khuda na mila