دشت غم میں سایۂ گیسو نہ ڈھونڈ

دشت غم میں سایۂ گیسو نہ ڈھونڈ

پتھروں میں درد کی خوشبو نہ ڈھونڈ

زندگی میں اب وہ رنگ و بو نہ ڈھونڈ

گل ادا گل پیرہن گل رو نہ ڈھونڈ

اپنے ہونٹوں پر تبسم کر تلاش

وقت کے رخسار پر آنسو نہ ڈھونڈ

مستیوں میں رقص طاؤس اب کہاں

شوخیوں میں وہ رم آہو نہ ڈھونڈ

موجزن ہے دل میں جو طوفاں وہ دیکھ

خشک آنکھوں میں مری آنسو نہ ڈھونڈ

ہو سکے تو اس روایت کو نہ توڑ

میں تجھے ڈھونڈوں گا مجھ کو تو نہ ڈھونڈ

دشمنوں میں بھی محاسن کر تلاش

ہم نفس تنقیص کے پہلو نہ ڈھونڈ

dasht-e-gham mein saya-e-gesu na dhund

pattharon mein dard ki khushbu na dhund

zindagi mein ab wo rang-o-bu na dhund

gul ada gul pairahan gul ru na dhund

apne honton par tabassum kar talash

waqt ke rukhsar par ansu na dhund

mastiyon mein raqs-e-taus ab kahan

shokhiyon mein wo ram-e-ahu na dhund

maujzan hai dil mein jo tufan wo dekh

khushk ankhon mein miri ansu na dhund

ho sake to is riwayat ko na tor

main tujhe dhundunga mujh ko to na dhund

dushmanon mein bhi mahasin kar talash

ham nafas tanqes ke pahlu na dhund