آج انہیں دیکھ لیا بزم میں فرزانوں کی

آج انہیں دیکھ لیا بزم میں فرزانوں کی

ہم نے تعریف سنی تھی ترے دیوانوں کی

دیدہ ور سلسلۂ اشک سمجھتے ہیں جسے

کہکشاں ہے مرے محبوب کے احسانوں کی

تم کو آنا ہے تو آ جاؤ اجالا ہے ابھی

شمعیں روشن ہیں مرے غم کے شبستانوں کی

معترض ہیں مری دیوانہ وشی پر وہ لوگ

جن کو دامن کی خبر ہے نہ گریبانوں کی

ہم ہیں میخانۂ فطرت کے شرابی ہم کو

نہ صراحی کی ضرورت ہے نہ پیمانوں کی

ہنس رہے ہو تو ہنسو اور ہنسو خوب ہنسو

حالت زار پہ ہم بے سر و سامانوں کی

عہد حاضر کے نئے میرؔ وہاں ہوں گے حبابؔ

مجھ کو محفل میں نہ لے جاؤ سخن دانوں کی

aj unhen dekh liya bazm mein farzanon ki

ham ne taarif suni thi tire diwanon ki

dida war silsila-e-ashk samajhte hain jise

kahkashan hai mire mahbub ke ehsanon ki

tum ko ana hai to a jao ujala hai abhi

shamen raushan hain mire gham ke shabistanon ki

motariz hain miri diwana washi par wo log

jin ko daman ki khabar hai na garebanon ki

ham hain maikhana-e-fitrat ke sharabi ham ko

na surahi ki zarurat hai na paimanon ki

hans rahe ho to hanso aur hanso khub hanso

halat-e-zar pe ham be sar-o-samanon ki

ahd-e-hazir ke nae mir wahan honge habab

mujh ko mahfil mein na le jao sukhan danon ki