ساز آلام پہ دل نغمہ سرا ہوتا ہے

ساز آلام پہ دل نغمہ سرا ہوتا ہے

اے محبت یہ ترے دور میں کیا ہوتا ہے

پھیل جاتی ہے فضاؤں میں اداسی کی گھٹا

عشق جب حسن سے رو رو کے جدا ہوتا ہے

حوصلہ دید کا ہرگز نہ کریں اہل نظر

جلوۂ حسن بہت ہوش ربا ہوتا ہے

وہ ہوس ہے جو گلہ کرتی ہے رنج و غم کا

عشق ہر حال میں راضی بہ رضا ہوتا ہے

ان کے مبہم سے اشاروں کا تأثر توبہ

دل میں کیا معرکۂ یاس و رجا ہوتا ہے

ہم جو کہتے ہیں اسے وقت کا شہکار جمیل

بات کچھ بھی نہیں لیکن وہ خفا ہوتا ہے

روش خاص پہ چلتا ہوں ادب میں پرویزؔ

میرے ہر شعر کا انداز نیا ہوتا ہے

saz-e-alam pe dil naghma sara hota hai

ai mohabbat ye tire daur mein kya hota hai

phail jati hai fazaon mein udasi ki ghata

ishq jab husn se ro ro ke juda hota hai

hausla did ka hargiz na karen ahl-e-nazar

jalwa-e-husn bahut hosh ruba hota hai

wo hawas hai jo gila karti hai ranj-o-gham ka

ishq har hal mein razi ba raza hota hai

un ke mubham se isharon ka tasar tauba

dil mein kya marka-e-yas-o-raja hota hai

ham jo kahte hain use waqt ka shahkar jamil

bat kuchh bhi nahin lekin wo khafa hota hai

rawish-e-khas pe chalta hun adab mein parwez

mere har sher ka andaz naya hota hai