سمندروں کے سفر پر ہیں رہنما بھی نہیں

سمندروں کے سفر پر ہیں رہنما بھی نہیں

ہم ایسے لوگوں کی کشتی کا ناخدا بھی نہیں

یقین دل کے لیے عالم گمانی میں

اسے پکار رہا ہوں تو سن رہا بھی نہیں

یہ کس امید پہ آنکھوں میں رقص باقی ہے

تو جا چکا ترے آنے کا آسرا بھی نہیں

الگ الگ سی ہے سمتوں کا اب سفر درپیش

تمہارا ہاتھ مرے ہاتھ سے جدا بھی نہیں

ہمیں سے رونق بازار عشق قائم تھی

ہمارے بعد تو شہروں میں کچھ بچا بھی نہیں

فضا میں حبس ہے جنگل اداس لگتا ہے

عجیب دکھ ہے پرندوں کا چہچہا بھی نہیں

زباں کی داد مگر تیرے لب تلک آؤں

میں ایک لفظ میں سمٹی ہوئی دعا بھی نہیں

تم ایک عمر کی کوشش میں رائیگاں گزرے

حریم دل میں چراغ وفا جلا بھی نہیں

میں اپنے قتل کا الزام کس کے سر رکھوں

یہاں تو میرے سوا کوئی دوسرا بھی نہیں

samundaron ke safar par hain rahnuma bhi nahin

ham aise logon ki kashti ka nakhuda bhi nahin

yaqin-e-dil ke liye alam gumani mein

use pukar raha hun to sun raha bhi nahin

ye kis umid pe ankhon mein raqs baqi hai

tu ja chuka tire ane ka asra bhi nahin

alag alag si hai samton ka ab safar darpesh

tumhara hath mire hath se juda bhi nahin

hamen se raunaq-e-bazar-e-ishq qaim thi

hamare baad to shahron mein kuchh bacha bhi nahin

faza mein habs hai jangal udas lagta hai

ajib dukh hai parindon ka chahchaha bhi nahin

zaban ki dad magar tere lab talak aun

main ek lafz mein simti hui dua bhi nahin

tum ek umr ki koshish mein raigan guzre

harim-e-dil mein charagh-e-wafa jala bhi nahin

main apne qatl ka ilzam kis ke sar rakhun

yahan to mere siwa koi dusra bhi nahin