اب معتقد‌ گردش دوراں نہ رہے ہم

اب معتقد‌ گردش دوراں نہ رہے ہم

قابل ترے اے دیدۂ جاناں نہ رہے ہم

کب مل کے انہیں دل کی تمنائیں بر آئیں

کب ان سے جدا ہو کے پریشاں نہ رہے ہم

یہ بات دگر ہے کہ نہ تھے روبرو ان کے

کب دید کا دل میں لئے ارماں نہ رہے ہم

قسمت تو ذرا دیکھو کب آئی ہیں بہاریں

جب قابل گل گشت گلستاں نہ رہے ہم

ساقی کی نگاہوں نے پلا دی ہے کچھ ایسی

جام‌ مئے گلفام کے خواہاں نہ رہے ہم

اب درد ہی راحت سی ہمیں دینے لگا ہے

چارہ گرو منت کش درماں نہ رہے ہم

آفتؔ رہ الفت میں ہنسی آئی تھی اک دن

بعد اس کے کبھی زیست میں خنداں نہ رہے ہم

ab motaqid-e-gardish dauran na rahe ham

qabil tire ai dida-e-janan na rahe ham

kab mil ke unhen dil ki tamannaen bar aen

kab un se juda ho ke pareshan na rahe ham

ye bat digar hai ke na the rubaru un ke

kab did ka dil mein liye arman na rahe ham

qismat to zara dekho kab ai hain baharen

jab qabil-e-gul gasht-e-gulistan na rahe ham

saqi ki nigahon ne pila di hai kuchh aisi

jam-e-mai gulfam ke khwahan na rahe ham

ab dard hi rahat si hamen dene laga hai

chara giro minnat kash-e-darman na rahe ham

afat rah-e-ulfat mein hansi ai thi ik din

baad us ke kabhi zist mein khandan na rahe ham