قبر پہ پھول کھلا آہستہ

قبر پہ پھول کھلا آہستہ

زخم سے خون بہا آہستہ

دھیان کے زینے پہ یادوں نے پھر

دیکھیے پاؤں دھرا آہستہ

کہنے کو وقت گزرتا ہی نہ تھا

اور جگ بیت گیا آہستہ

کاٹے سے رات نہیں کٹتی تھی

پھر بھی دن آ ہی گیا آہستہ

آنکھ میں چہرہ بسا رہتا ہے

اس لئے اشک گرا آہستہ

میں جو مدت میں ہنسی دل نے کہا

کیا تجھے صبر ملا آہستہ

رو کے میں نے یہ کہا دنیا ہے

غم کو سہنا ہی پڑا آہستہ

qabr pe phul khula ahista

zakhm se khun baha ahista

dhyan ke zine pe yadon ne phir

dekhiye paon dhara ahista

kahne ko waqt guzarta hi na tha

aur jag bit gaya ahista

kate se rat nahin katti thi

phir bhi din a hi gaya ahista

ankh mein chehra basa rahta hai

is liye ashk gira ahista

main jo muddat mein hansi dil ne kaha

kya tujhe sabr mila ahista

ro ke main ne ye kaha duniya hai

gham ko sahna hi para ahista