وہ رنجشیں وہ مراسم کا سلسلہ ہی نہیں

وہ رنجشیں وہ مراسم کا سلسلہ ہی نہیں

یہاں کسی میں وہ پہلا سا رابطہ ہی نہیں

میں خوشبوؤں کے تعاقب میں آ گیا ہوں وہاں

جہاں سے لوٹ کے جانے کا راستا ہی نہیں

یہ خود سری یا شرارت اسی کا حصہ ہے

وہ کوئی کھیل محبت میں ہارتا ہی نہیں

یہ اعتراف بھی گھبرا کے کر لیا میں نے

میں چاہتا ہوں تجھے صرف سوچتا ہی نہیں

اڑا کے لے گیا راتوں کی نیند آنکھوں سے

وہ کم سخن جو کبھی مجھ سے بولتا ہی نہیں

پکارتا ہوں میں اس کو اسی کی چوکھٹ سے

کواڑ جسم کے جو مجھ پہ کھولتا ہی نہیں

تباہ ہو گئے خودداریوں میں دونوں رئیسؔ

وہ خود کو سونپ دے لیکن میں مانگتا ہی نہیں

wo ranjishen wo marasim ka silsila hi nahin

yahan kisi mein wo pahla sa rabta hi nahin

main khushbuon ke taaqub mein a gaya hun wahan

jahan se laut ke jane ka rasta hi nahin

ye khud siri ya shararat usi ka hissa hai

wo koi khel mohabbat mein harta hi nahin

ye etiraf bhi ghabra ke kar liya main ne

main chahta hun tujhe sirf sochta hi nahin

ura ke le gaya raton ki nind ankhon se

wo kam sukhan jo kabhi mujh se bolta hi nahin

pukarta hun main us ko usi ki chaukhat se

kiwar jism ke jo mujh pe kholta hi nahin

tabah ho gae khuddariyon mein donon rais

wo khud ko saunp de lekin main mangta hi nahin