بسنتی رت ہے سب پھولوں کو تو محفوظ رکھنا

بسنتی رت ہے سب پھولوں کو تو محفوظ رکھنا

میرے اللہ کھلی سرسوں کو تو محفوظ رکھنا

سروں کو کاٹنے کی فصل پھر سے آ گئی ہے

ان افشاں سے بھری مانگوں کو تو محفوظ رکھنا

جلیں جب گھر تو یا رب تجھ سے اتنی التجا ہے

دوپٹوں سے ڈھکے چہروں کو تو محفوظ رکھنا

فضاؤں میں ہزاروں باز منڈلانے لگے ہیں

ہر آنگن کی سبھی چڑیوں کو تو محفوظ رکھنا

ابھی خیمے بھی ہیں کوزے بھی ہیں پانی نہیں ہے

قسم عباس کی بچوں کو تو محفوظ رکھنا

بزرگوں کی دعائیں آج کتنی لازمی ہیں

جوانوں کے لئے بوڑھوں کو تو محفوظ رکھنا

سوا نیزے پہ سورج آ رہا ہے آ نہ جائے

ہواؤں کے خنک جھونکوں کو تو محفوظ رکھنا

سلگتی رت میں شبنمؔ یہ ترا ہی فرض ٹھہرا

چمن میں اب کے سب کلیوں کو تو محفوظ رکھنا

basanti rut hai sab phulon ko to mahfuz rakhna

mere allah khuli sarson ko to mahfuz rakhna

saron ko katne ki fasl phir se a gai hai

un afshan se bhari mangon ko to mahfuz rakhna

jalen jab ghar to ya rab tujh se itni iltija hai

dupatton se dhake chehron ko to mahfuz rakhna

fazaon mein hazaron baz mandlane lage hain

har angan ki sabhi chiriyon ko to mahfuz rakhna

abhi kheme bhi hain kuze bhi hain pani nahin hai

qasam abbas ki bachchon ko to mahfuz rakhna

buzurgon ki duaen aj kitni lazmi hain

jawanon ke liye burhon ko to mahfuz rakhna

siwa neze pe suraj a raha hai a na jae

hawaon ke khunuk jhonkon ko to mahfuz rakhna

sulagti rut mein shabnam ye tira hi farz thahra

chaman mein ab ke sab kaliyon ko to mahfuz rakhna