ذات کے کرب کو لفظوں میں دبائے رکھا

ذات کے کرب کو لفظوں میں دبائے رکھا

میز پر تیری کتابوں کو سجائے رکھا

تو نے اک شام جو آنے کا کیا تھا وعدہ

میں نے دن رات چراغوں کو جلائے رکھا

کس سلیقے سے خیالوں کو زباں دے دے کر

مجھ کو اس شخص نے باتوں میں لگائے رکھا

میں وہ سیتا کہ جو لچھمن کے حصاروں میں رہی

ہم وہ جوگی کہ الکھ پھر بھی جگائے رکھا

شاید آ جائے کسی روز وہ سجدہ کرنے

اسی امید پہ آنچل کو بچھائے رکھا

چوڑیاں رکھ نہ سکیں میری نمازوں کا بھرم

پھر بھی ہاتھوں کو دعاؤں میں اٹھائے رکھا

جانے کیوں آ گئی پھر یاد اسی موسم کی

جس نے شبنمؔ کو ہواؤں سے بچائے رکھا

zat ke karb ko lafzon mein dabae rakha

mez par teri kitabon ko sajae rakha

tu ne ik sham jo ane ka kiya tha waada

main ne din rat charaghon ko jalae rakha

kis saliqe se khayalon ko zaban de de kar

mujh ko us shakhs ne baton mein lagae rakha

main wo saita ke jo lachhman ke hisaron mein rahi

ham wo jogi ke alakh phir bhi jagae rakha

shayad a jae kisi roz wo sajda karne

isi ummid pe anchal ko bichhae rakha

chauriyan rakh na saken meri namazon ka bharam

phir bhi hathon ko duaon mein uthae rakha

jane kyun a gai phir yad isi mausam ki

jis ne shabnam ko hawaon se bachae rakha