گھرے ہیں چاروں طرف بیکسی کے بادل پھر

گھرے ہیں چاروں طرف بیکسی کے بادل پھر

سلگ رہا ہے ستاروں بھرا اک آنچل پھر

بس ایک بار ان آنکھوں کو اس نے چوما تھا

ہمیشہ نم ہی رہا آنسوؤں سے کاجل پھر

یہ کیسی آگ ہے جو پور پور روشن ہے

یہ کس نے رکھ دی مری انگلیوں پہ مشعل پھر

پھر اب کی بار لہو رنگ بارشیں برسیں

کسی نے کاٹ دئے ہیں سروں کے جنگل پھر

رگوں میں تپتی ہوئی خوشبوئیں مچلنے لگیں

ملا بدن پہ نئے موسموں نے صندل پھر

کہیں تو ریت سے چشمہ نکل ہی آئے گا

بھٹک رہا ہے وہ کاندھوں پہ لے کے چھاگل پھر

پھر اس اکیلی بھری دوپہر نے جھلسا ہے

کہ یاد آنے لگا صبح سے وہ پاگل پھر

ghire hain charon taraf bekasi ke badal phir

sulag raha hai sitaron bhara ik anchal phir

bas ek bar in ankhon ko us ne chuma tha

hamesha nam hi raha ansuon se kajal phir

ye kaisi ag hai jo por por raushan hai

ye kis ne rakh di miri ungliyon pe mashal phir

phir ab ki bar lahu rang barishen barsen

kisi ne kat diye hain saron ke jangal phir

ragon mein tapti hui khushbuen machalne lagen

mila badan pe nae mausamon ne sandal phir

kahin to ret se chashma nikal hi aega

bhatak raha hai wo kandhon pe le ke chhagal phir

phir is akeli bhari dopahar ne jhulsa hai

ke yad ane laga subh se wo pagal phir