بدلتی رت پہ ہواؤں کے سخت پہرے تھے

بدلتی رت پہ ہواؤں کے سخت پہرے تھے

لہو لہو تھی نظر داغ داغ چہرے تھے

یہ راز کھل نہ سکا حرف نا رسا پہ مرے

صدائیں تیز بہت تھیں کہ لوگ بہرے تھے

وہ پوجنے کی سیاست سے خوب واقف تھا

وہی چڑھائے جو گیندے کے زرد سہرے تھے

جو بھائی لوٹ کے آئے کبھی نہ دریا سے

انہیں کے بازو قوی تھے بدن اکہرے تھے

اسی سبب سے مرا عکس ٹوٹ ٹوٹ گیا

اس آئنے میں کئی اور بھی تو چہرے تھے

سمندروں کا وہ پیاسا تھا اور اوس تھی میں

وہ ابر لوٹ گیا جس کے لب سنہرے تھے

ان آنچلوں پہ کوئی سجدہ ریز ہو نہ سکا

کہ جن کے رنگ بہت شوخ اور گہرے تھے

سماعتوں کے دھندلکوں میں کھو گئے شبنمؔ

وہ سارے لفظ جو پلکوں پہ آ کے ٹھہرے تھے

badalti rut pe hawaon ke sakht pahre the

lahu lahu thi nazar dagh dagh chehre the

ye raz khul na saka harf na rasa pe mire

sadaen tez bahut thin ke log bahre the

wo pujne ki siyasat se khub waqif tha

wahi charhae jo gende ke zard sehre the

jo bhai laut ke ae kabhi na dariya se

unhen ke bazu qawi the badan ikahre the

isi sabab se mira aks tut tut gaya

is aine mein kai aur bhi to chehre the

samundaron ka wo pyasa tha aur os thi main

wo abr laut gaya jis ke lab sunahre the

in anchalon pe koi sajda rez ho na saka

ke jin ke rang bahut shokh aur gahre the

samaaton ke dhundalkon mein kho gae shabnam

wo sare lafz jo palkon pe a ke thahre the