اپنی پلکوں سے جو ٹوٹے ہیں گہر دیکھتے ہیں

اپنی پلکوں سے جو ٹوٹے ہیں گہر دیکھتے ہیں

ہم دعا مانگتے ہیں اور اثر دیکھتے ہیں

کوئی برسا ہوا بادل بھی جو گزرا ہے تو ہم

ڈر کے بارش میں ٹپکتا ہوا گھر دیکھتے ہیں

سیر کیسی یہاں تہذیب کی زنجیر بھی ہے

ہم تو بس روزن دیوار سے در دیکھتے ہیں

صرف خوابوں کا جہاں ہم نے سجایا ورنہ

لوگ تو جی میں جو آ جائے وہ کر دیکھتے ہیں

داغ دل دیدۂ تر وحشت جاں تنہائی

ان کو کیا وہ تو فقط عرض ہنر دیکھتے ہیں

ایک وہ منزلیں بڑھ کر جنہیں لینے آئیں

ایک ہم راہ میں جو گرد سفر دیکھتے ہیں

دل بجھا جاتا ہو جب رات کی تاریکی میں

دیکھنے والے تب آثار سحر دیکھتے ہیں

apni palkon se jo tute hain guhar dekhte hain

ham dua mangte hain aur asar dekhte hain

koi barsa hua badal bhi jo guzra hai to ham

dar ke barish mein tapakta hua ghar dekhte hain

sair kaisi yahan tahzib ki zanjir bhi hai

ham to bas rauzan-e-diwar se dar dekhte hain

sirf khwabon ka jahan ham ne sajaya warna

log to ji mein jo a jae wo kar dekhte hain

dagh-e-dil dida-e-tar wahshat-e-jan tanhai

un ko kya wo to faqat arz-e-hunar dekhte hain

ek wo manzilen barh kar jinhen lene aen

ek ham rah mein jo gard-e-safar dekhte hain

dil bujha jata ho jab rat ki tariki mein

dekhne wale tab asar-e-sahar dekhte hain