میں نے سن رکھی ہے صاحب ایک کہانی دریا کی

میں نے سن رکھی ہے صاحب ایک کہانی دریا کی

شام کنارے بیٹھ کے اک دن وہ بھی زبانی دریا کی

ورنہ ہم بھی آئینے کے بھید سے واقف ہو جاتے

ہم نے اپنی من مانی کی ایک نہ مانی دریا کی

ریت کے چھوٹے ٹکڑے پر ہی آبادی مقصود ہوئی

اسی بہانے چاروں جانب ہے سلطانی دریا کی

آنکھیں ہی اظہار کریں تو شاید کوئی بات بنے

سورج ڈھلتے وقت جو دیکھی تھی ویرانی دریا کی

صبح ازل سے ایک ہی جیسے ملتے جلتے دریا ہیں

کس نے دیکھی کس نے جانی شکل پرانی دریا کی

سات سمندر دیکھنے لگ گئے اپنے بڑھاپے کی جھریاں

اپنے جوبن پر جب آئی شوخ جوانی دریا کی

main ne sun rakhi hai sahab ek kahani dariya ki

sham kinare baith ke ik din wo bhi zabani dariya ki

warna ham bhi aine ke bhed se waqif ho jate

ham ne apni man mani ki ek na mani dariya ki

ret ke chhote tukre par hi abadi maqsud hui

isi bahane charon janib hai sultani dariya ki

ankhen hi izhar karen to shayad koi bat bane

suraj dhalte waqt jo dekhi thi wirani dariya ki

subh-e-azal se ek hi jaise milte jalte dariya hain

kis ne dekhi kis ne jani shakl purani dariya ki

sat samundar dekhne lag gae apne burhape ki jhiriyan

apne joban par jab ai shokh jawani dariya ki