ہمارے واسطے رستے کہاں دعا کے تھے

ہمارے واسطے رستے کہاں دعا کے تھے

ہزار زینے بس اپنے نقوش پا کے تھے

شرر تھا آہ تھی ذرہ تھا اور قطرہ تھا

کئی نشاں مری ٹوٹی ہوئی انا کے تھے

جسے سمجھتے تھے سب اتحاد میل ملاپ

یہی لگا کہ اشارے وہ ہاں میں نا کے تھے

دلالی کیسی بلا تھی خدایا کیسے کہوں

ہماری منزلیں اور رستے رہ نما کے تھے

سمجھ میں آ گیا جلدی حیات و مرگ کا راز

کہ ابتدا ہی میں آثار انتہا کے تھے

خیال آیا وہیں آنکھیں موند لوں اپنی

جہاں سے راستے پھر آگے چشم وا کے تھے

hamare waste raste kahan dua ke the

hazar zine bas apne nuqush-e-pa ke the

sharar tha ah thi zarra tha aur qatra tha

kai nishan miri tuti hui ana ke the

jise samajhte the sab ittihad mel milap

yahi laga ke ishare wo han main na ke the

dallali kaisi bala thi khudaya kaise kahun

hamari manzilen aur raste rah numa ke the

samajh mein a gaya jaldi hayat-o-marg ka raz

ke ibtida hi mein asar intiha ke the

khayal aya wahin ankhen mund lun apni

jahan se raste phir age chashm-e-wa ke the