ہجر کی داستاں نئی لکھوں

ہجر کی داستاں نئی لکھوں

رات کاٹوں مگر صدی لکھوں

اپنی خاطر فقط تجھے مانگوں

تیرے حصے میں ہر خوشی لکھوں

ڈر ہے تیرے فراق کا ورنہ

جی میں ہے تجھ کو زندگی لکھوں

گردش روز و شب بتا تو ہی

کس کہی کو میں ان کہی لکھوں

دانے دانے پہ بھوک ثبت کروں

قطرے قطرے پہ تشنگی لکھوں

مجھ کو اتنی زمین بھی نہ ملی

جس کو گھر جانوں بے گھری لکھوں

وہ سودھاکرؔ ہوں اک سودھاکرؔ میں

جسم کی سوچوں روح کی لکھوں

hijr ki dastan nai likhun

rat katun magar sadi likhun

apni khatir faqat tujhe mangun

tere hisse mein har khushi likhun

dar hai tere firaq ka warna

ji mein hai tujh ko zindagi likhun

gardish-e-roz-o-shab bata tu hi

kis kahi ko main an kahi likhun

dane dane pe bhuk sabt karun

qatre qatre pe tishnagi-e-likhun

mujh ko itni zamin bhi na mili

jis ko ghar janun be ghiri likhun

wo sodhakar hun ik sodhakar mein

jism ki sochun ruh ki likhun