ہے میرے سامنے تصویر چشم یار ہنوز

ہے میرے سامنے تصویر چشم یار ہنوز

میں پی رہا ہوں مئے حسن بار بار ہنوز

تمام رات وہ اٹھ اٹھ کے بیٹھنا توبہ

مری نگاہ میں ہے حشر انتظار ہنوز

بقدر شوق ترا درد مند عشق ہوں میں

بقدر ظرف مرا دل ہے بیقرار ہنوز

اگرچہ ایک دفعہ پی تھی زندگی کی شراب

بھگت رہا ہوں میں خمیازۂ خمار ہنوز

بہار روٹھ کے مجھ سے چلی گئی لیکن

مری نگاہ میں ہے جلوۂ بہار ہنوز

یقین ہے کہ وہ انورؔ یہاں نہ آئیں گے

اٹھا رہا ہوں مگر لطف انتظار ہنوز

hai mere samne taswir chashm-e-yar hanoz

main pi raha hun mai-e-husn bar bar hanoz

tamam rat wo uth uth ke baithna tauba

miri nigah mein hai hashr intizar hanoz

baqadr-e-shauq tira dard mand-e-ishq hun main

baqadr-e-zarf mira dil hai beqarar hanoz

agarche ek dafa pi thi zindagi ki sharab

bhagat raha hun main khamyaza-e-khumar hanoz

bahar ruth ke mujh se chali gai lekin

miri nigah mein hai jalwa-e-bahar hanoz

yaqin hai ke wo anwar yahan na aenge

utha raha hun magar lutf-e-intizar hanoz