اس بت کی زباں پر لو انورؔ پھر آج تمہارا نام آیا

اس بت کی زباں پر لو انورؔ پھر آج تمہارا نام آیا

کیا جذب محبت جاگ اٹھا کیا جوش جنوں پھر کام آیا

لو دیکھ لو وہ نمناک آنکھیں لو سن لو وہ زیر لب آہیں

بیمار حسیں کے ہونٹوں پر کیا جانئے کیا پیغام آیا

ان مست نگاہوں نے اٹھ کر فوراً ہی پلا دی تھوڑی سی

رندوں پہ جہاں ہشیاری کا محفل میں کوئی الزام آیا

کیا جانئے کیوں دل بھر آیا معلوم نہیں کیا بات ہوئی

پھر ایک دھواں سا دل سے اٹھا جب میرے لبوں تک جام آیا

کچھ تجھ کو خبر بھی ہے ظالم اے مست خرام بے پردا

یہ خاک کا ذرہ ذرہ کیوں دل بن کے بہ زیر گام آیا

دیتا ہوں تسلی میں انورؔ دل کو یہی کہہ کہہ کر اکثر

اب نامہ بر آنے والا ہے اب ان کا کوئی پیغام آیا