نہ کوئی نغمہ ہوں نہ ساز خوش نوا ہوں میں

نہ کوئی نغمہ ہوں نہ ساز خوش نوا ہوں میں

شکست شیشۂ دل کی مگر صدا ہوں میں

وہ جلوہ بار ہیں جس سمت دیکھتا ہوں میں

تجلیات محبت میں گھر گیا ہوں میں

نگاہ یاس مری ترجمان دل کیوں ہو

خود آرزوئے مجسم بنا ہوا ہوں میں

بہار حسن و شباب بہار یا اللہ

بس اک نگاہ سراپا بنا ہوا ہوں میں

تمام روح کھنچ آئی ہے دونوں آنکھوں میں

یہ کون سامنے ہے کس کو دیکھتا ہوں میں

حریم حسن سے یہ کون ہے تجلی ریز

تمام حیرت جلوہ بنا ہوا ہوں میں

خیال حسن و شراب سرشک و نغمۂ درد

نشاط و رنگ مجسم بنا ہوا ہوں میں

یہ کون جلوہ نما ہے کہ آج پھر سر بزم

شراب حسن نگاہوں سے پی رہا ہوں میں

یہ کس نے چھیڑ دیا ساز زندگی انورؔ

تمام نغمہ و فریاد بن گیا ہوں میں

na koi naghma hun na saz khush nawa hun main

shikast-e-shisha-e-dil ki magar sada hun main

wo jalwa bar hain jis samt dekhta hun main

tajliyat-e-mohabbat mein ghar gaya hun main

nigah-e-yas miri tarjuman-e-dil kyun ho

khud arzu-e-mujassam bana hua hun main

bahar-e-husn-o-shabab-e-bahar ya allah

bas ik nigah sarapa bana hua hun main

tamam ruh khinch ai hai donon ankhon mein

ye kaun samne hai kis ko dekhta hun main

harim-e-husn se ye kaun hai tajalli rez

tamam hairat jalwa bana hua hun main

khayal-e-husn-o-sharab-e-sarishk-o-naghma-e-dard

nishat-o-rang mujassam bana hua hun main

ye kaun jalwa numa hai ke aj phir sar-e-bazm

sharab-e-husn nigahon se pi raha hun main

ye kis ne chher diya saz-e-zindagi anwar

tamam naghma-o-fariyad ban gaya hun main