نہ لائے دیکھنے کی تاب جلوہ دیکھنے والے

نہ لائے دیکھنے کی تاب جلوہ دیکھنے والے

تماشا بن گئے خود ہی تماشا دیکھنے والے

سراپا طنز ہوں اور طنز بھی منشائے فطرت کا

مجھے کیا دیکھتا ہے جا گزر جا دیکھنے والے

کہیں تیری نظر افسانۂ موسیٰ نہ بن جائے

ذرا ہشیار رہنا دل کی دنیا دیکھنے والے

بہر صورت تجھی کو دیکھتے ہیں جس طرح دیکھوں

تیری نظروں سے بچ کر تیرا جلوہ دیکھنے والے

ابھی پردے تعین کے کہاں اٹھے ہیں اے غافل

ابھی دیکھا ہی کیا ہے تو نے جلوہ دیکھنے والے

تو اپنے منصب عالی سے بھی اے کاش واقف ہو

بہ حیرت جانب اوج ثریا دیکھنے والے

کمال حسن کا نظارہ نا ممکن سہی انورؔ

مگر کچھ دیکھ ہی لیتے ہیں جلوہ دیکھنے والے

na lae dekhne ki tab-e-jalwa dekhne wale

tamasha ban gae khud hi tamasha dekhne wale

sarapa tanz hun aur tanz bhi mansha-e-fitrat ka

mujhe kya dekhta hai ja guzar ja dekhne wale

kahin teri nazar afsana-e-musa na ban jae

zara hushyar rahna dil ki duniya dekhne wale

bahar surat tujhi ko dekhte hain jis tarah dekhun

teri nazron se bach kar tera jalwa dekhne wale

abhi parde taayyun ke kahan uthe hain ai ghafil

abhi dekha hi kya hai tu ne jalwa dekhne wale

tu apne mansab-e-ali se bhi ai kash waqif ho

ba hairat janib-e-auj-e-surayya dekhne wale

kamal-e-husn ka nazzara na mumkin sahi anwar

magar kuchh dekh hi lete hain jalwa dekhne wale