Arooz is now on the App Store, for iPhone and iPad. Download →

All poetry

دل مٹ گیا تو خیر ضرورت نہیں رہی

Nadir Shahjahanpuri (1890–1963)

دل مٹ گیا تو خیر ضرورت نہیں رہی

حسرت یہ رہ گئی ہے کہ حسرت نہیں رہی

یہ دل بدل گیا کہ زمانہ بدل گیا

یا تیری آنکھ میں وہ مروت نہیں رہی

تیری نظر کے ساتھ بدلتا رہا ہے دل

دو روز بھی تو ایک سی حالت نہیں رہی

تر دامنی سے ہاتھ نہ دھو اے دل حزیں

کیا اب خدا کی جوش پہ رحمت نہیں رہی

دیکھے گا خواب میں بھی نہ وہ صورت سکوں

جس کو خدا سے چشم عنایت نہیں رہی

ان کی گلی نہیں ہے نہ ان کا حریم ہے

جنت بھی میرے واسطے جنت نہیں رہی

کس شب تڑپ تڑپ کے نہ کاٹی تمام شب

کس روز میرے گھر پہ قیامت نہیں رہی

نادرؔ نہ آئے حرف تمہاری زبان پر

وہ شعر کیا ہے جس میں فصاحت نہیں رہی