مرے مٹنے پہ گر تو بھی مٹا ہوتا تو کیا ہوتا

مرے مٹنے پہ گر تو بھی مٹا ہوتا تو کیا ہوتا

تجھے بھی صبر اے دل آ گیا ہوتا تو کیا ہوتا

چلے آتے ہیں لاکھوں سرفروشی کی تمنا میں

ترا کوچہ اگر دار الشفا ہوتا تو کیا ہوتا

عدم سے میں نہ آتا اس جہاں میں غم اٹھانے کو

اگر ہستی مجھے تیرا پتا ہوتا تو کیا ہوتا

تجھی پہ منصفی ہے لے تو ہی انصاف سے کہہ دے

اگر تیری طرح میں بے وفا ہوتا تو کیا ہوتا

ستارے کیوں دکھاتی مجھ کو دن بھر میری ناکامی

وہ شب کو مل کے افشاں آ گیا ہوتا تو کیا ہوتا

سر شوریدہ کو میں پتھروں سے پھوڑتا پھرتا

بت کافر جو تو میرا خدا ہوتا تو کیا ہوتا

ثبات اس کو نہیں پھر بھی فدا ہے حضرت انساں

جو یہ دار فنا دار بقا ہوتا تو کیا ہوتا

کسی کے پاس رہ کر بھی تڑپتے ہجر میں نادرؔ

ہمیں جنت میں بھی کچھ آسرا ہوتا تو کیا ہوتا

mire mitne pe gar tu bhi mita hota to kya hota

tujhe bhi sabr ai dil a gaya hota to kya hota

chale ate hain lakhon sarfaroshi ki tamanna mein

tira kucha agar dar-e-alshshifa hota to kya hota

adam se main na ata is jahan mein gham uthane ko

agar hasti mujhe tera pata hota to kya hota

tujhi pe munsifi hai le tu hi insaf se kah de

agar teri tarah main be wafa hota to kya hota

sitare kyun dikhati mujh ko din bhar meri nakami

wo shab ko mil ke afshan a gaya hota to kya hota

sar-e-shorida ko main pattharon se phorta phirta

but-e-kafir jo tu mera khuda hota to kya hota

sabat us ko nahin phir bhi fida hai hazrat-e-insan

jo ye dar-e-fana dar-e-baqa hota to kya hota

kisi ke pas rah kar bhi tarapte hijr mein nadir

hamen jannat mein bhi kuchh asra hota to kya hota