کئے قرار مگر بے قرار ہی رکھا

کئے قرار مگر بے قرار ہی رکھا

ہمیں تو آپ نے امیدوار ہی رکھا

پس فنا بھی فلک نے غبار ہی رکھا

نہ رکھی خاک نہ سنگ مزار ہی رکھا

کسی کے درد جدائی نے ہم کو جیتے جی

مثال ابر سیہ اشک بار ہی رکھا

میں تیغ یار کا کیوں کر نہ دم بھروں جس نے

مزے خلش کے دئیے دل فگار ہی رکھا

ملا نہ چین کبھی ہم کو خاک ہو کر بھی

فلک نے دوش صبا پر سوار ہی رکھا

خیال عارض رنگیں نے روز آ آ کر

خزاں میں بھی ہمیں محو بہار ہی رکھا

کسی کی چشم مکیف نے کیا کہیں نادرؔ

تمام عمر ہمیں بادہ خوار ہی رکھا

kiye qarar magar be qarar hi rakha

hamen to ap ne umidwar hi rakha

pas fana bhi falak ne ghubar hi rakha

na rakhi khak na sang-e-mazar hi rakha

kisi ke dard-e-judai ne ham ko jite ji

misal-e-abr-e-siyah ashk bar hi rakha

main tegh-e-yar ka kyun kar na dam bharun jis ne

maze khalish ke diye dil figar hi rakha

mila na chain kabhi ham ko khak ho kar bhi

falak ne dosh-e-saba par sawar hi rakha

khayal-e-ariz-e-rangin ne roz a a kar

khizan mein bhi hamen mahw-e-bahar hi rakha

kisi ki chashm-e-mukayyif ne kya kahen nadir

tamam umr hamen bada khwar hi rakha