Arooz is now on the App Store, for iPhone and iPad. Download →

All poetry

وہ خواب جیسا تھا گویا سراب لگتا تھا

Ibn-e-Mufti

وہ خواب جیسا تھا گویا سراب لگتا تھا

حسین ایسا کہ فخر گلاب لگتا تھا

حلیم ایسا کہ دیوانی ایک دنیا تھی

کہ اس سے ہاتھ ملانا ثواب لگتا تھا

نبھانا رشتوں کا نازک کٹھن عمل نکلا

جو دیکھنے میں تو سیدھا حساب لگتا تھا

صراحی دار تھی گردن نشہ بھرے عارض

سراپا اس کا مجسم شراب لگتا تھا

وہ بولتا تو فضا نغمگی میں رچ جاتی

گلے میں ہو کوئی اس کے رباب لگتا تھا

کہانی ایک نئی دیتی ہونٹ کی جنبش

وہ لب جو کھولتا گویا کتاب لگتا تھا

وہ شخص آج گریزاں ہے سائے سے میرے

جسے پسینہ بھی میرا گلاب لگتا تھا

عمل میں فعل میں اس کے تضاد تھا مفتیؔ

اگرچہ دل میں اترتا خطاب لگتا تھا