شوق جب بھی بندگی کا رہنما ہوتا نہیں

شوق جب بھی بندگی کا رہنما ہوتا نہیں

زندگی سے زندگی کا حق ادا ہوتا نہیں

کیا سمجھ آئیں گی تم کو عشق کی باریکیاں

دل تمہارا جب تلک درد آشنا ہوتا نہیں

روح و تن کا عشق یہ قائم رہے گا دائمی

ختم بعد مرگ بھی یہ سلسلہ ہوتا نہیں

کون ہے جو جرم کرنے کو ہے شب کا منتظر

روشنی میں دن کی یارو کیا بھلا ہوتا نہیں

غالباً ہوتا مجھے بھی گھر کے گرنے کا گلہ

راہگیروں کا اگر یہ راستہ ہوتا نہیں

بد گمانی کی فضا میں کیا صفائی دیں تمہیں

اس فضا میں کوئی بھی حل مسئلہ ہوتا نہیں

اک ذرا سی بات پہ یہ منہ بنانا روٹھنا

اس طرح تو کوئی اپنوں سے خفا ہوتا نہیں

کوئی گستاخی تو کی ہے ناؤ نے گرداب سے

ورنہ یوں ساحل پہ کوئی غمزدہ ہوتا نہیں

کمرۂ تقدیر میں آتی عروس آرزو

وقت ناہنجار کا جو فیصلہ ہوتا نہیں

آنکھ سے پینے کا بھی ساقی نے مانگا ہے حساب

اس روش سے یارو کوئی مے کدہ ہوتا نہیں

مفتیؔ دیکھو مہر پلٹا ہے مری تقدیر کا

دیکھتے ہیں کس طرح سجدہ ادا ہوتا نہیں

shauq jab bhi bandagi ka rahnuma hota nahin

zindagi se zindagi ka haq ada hota nahin

kya samajh aengi tum ko ishq ki barikiyan

dil tumhara jab talak dard-e-ashna hota nahin

ruh-o-tan ka ishq ye qaim rahega daimi

khatm baad-e-marg bhi ye silsila hota nahin

kaun hai jo jurm karne ko hai shab ka muntazir

raushni mein din ki yaro kya bhala hota nahin

ghaliban hota mujhe bhi ghar ke girne ka gila

rahgiron ka agar ye rasta hota nahin

bad gumani ki faza mein kya safai den tumhen

is faza mein koi bhi hal masala hota nahin

ik zara si bat pe ye munh banana ruthna

is tarah to koi apnon se khafa hota nahin

koi gustakhi to ki hai nao ne girdab se

warna yun sahil pe koi ghamzada hota nahin

kamra-e-taqdir mein ati urus-e-arzu

waqt nahanjar ka jo faisla hota nahin

ankh se pine ka bhi saqi ne manga hai hisab

is rawish se yaro koi mai kada hota nahin

mufti dekho mehr palta hai miri taqdir ka

dekhte hain kis tarah sajda ada hota nahin