وہیں پر ہوں جہاں رکتا رہا ہوں

وہیں پر ہوں جہاں رکتا رہا ہوں

میں اپنے آپ سے اکتا رہا ہوں

گزرتی عمر کے ہم راہ خود پر

صحیفوں کی طرح کھلتا رہا ہوں

سنو میری بھی کچھ اب تو خدارا

تمہاری بھی تو میں سنتا رہا ہوں

جو کیں ہیں پیش تم نے کیا بتاؤں

ہر اک منطق پہ سر دھنتا رہا ہوں

بچانے خود کو اپنی ہی تپش سے

میں اپنے سائے میں چھپتا رہا ہوں

بہت ڈھونڈا ہے میں نے خود کو لیکن

اسی کوشش میں خود گمتا رہا ہوں

چلے آتے ہیں روزانہ ڈرانے

وہ جن کے قرض میں چکتا رہا ہوں

پرائے شہر میں یاروں سے کٹ کر

غریبوں کی طرح رلتا رہا ہوں

یہ قیمت کم ہے شاید میں تمہارے

ترازو میں غلط تلتا رہا ہوں

نہیں عادت مجھے پینے کی میں تو

تمہاری یاد میں گھلتا رہا ہوں

چلے آؤ کہ رستہ صاف ہے اب

میں کانٹے راہ کے چنتا رہا ہوں

wahin par hun jahan rukta raha hun

main apne ap se ukta raha hun

guzarti umr ke ham rah khud par

sahifon ki tarah khulta raha hun

suno meri bhi kuchh ab to khudara

tumhari bhi to main sunta raha hun

jo kin hain pesh tum ne kya bataun

har ik mantiq pe sar dhunta raha hun

bachane khud ko apni hi tapish se

main apne sae mein chhupta raha hun

bahut dhunda hai main ne khud ko lekin

isi koshish mein khud gamta raha hun

chale ate hain rozana darane

wo jin ke qarz mein chukta raha hun

parae shahr mein yaron se kat kar

gharibon ki tarah rulta raha hun

ye qimat kam hai shayad main tumhare

tarazu mein ghalat talta raha hun

nahin adat mujhe pine ki main to

tumhari yad mein ghulta raha hun

chale ao ke rasta saf hai ab

main kante rah ke chunta raha hun