سبھی سمتوں کو ٹھکرا کر اڑی جائے

سبھی سمتوں کو ٹھکرا کر اڑی جائے

کہاں تک جانے گرد گم رہی جائے

بچا کر اپنے سائے کو کہاں رکھوں

کہ شب تو ہر طرف کو پھیلتی جائے

کوئی دیوار ہے تیری سماعت بھی

کہ جو آواز آئے لوٹتی جائے

نہ پہروں لکھ سکوں میں کوئی بات اپنی

عجب سی گرد کاغذ پر جمی جائے

اچانک ٹوٹ جائے قصر تنہائی

کوئی آواز کھڑکی کھولتی جائے

سنا ہے میں صداؤں کا سمندر ہوں

یہ سناٹا کہیں مجھ کو نہ پی جائے

وہاں بسنے کی خواہش منہ تکے میرا

عمارت بنتے بنتے ٹوٹتی جائے

ابھرتے جائیں رنگوں کے کھلے منظر

مگر بے فرصتی آنکھوں کو سی جائے

یوں ہی کھپتے نہ جائیں روز و شب میں ہم

کبھی تو بات بے موسم بھی کی جائے

یہ تم کس کے لئے جلتے ہو گوشوں میں

چلو چھت پر سڑک تک روشنی جائے

sabhi samton ko thukra kar uri jae

kahan tak jane gard-e-gum rahi jae

bacha kar apne sae ko kahan rakhun

ke shab to har taraf ko phailti jae

koi diwar hai teri samaat bhi

ke jo awaz ae lautti jae

na pahron likh sakun mein koi bat apni

ajab si gard kaghaz par jami jae

achanak tut jae qasr-e-tanhai

koi awaz khirki kholti jae

suna hai main sadaon ka samundar hun

ye sannata kahin mujh ko na pi jae

wahan basne ki khwahish munh take mera

imarat bante bante tutti jae

ubharte jaen rangon ke khule manzar

magar be fursati ankhon ko si jae

yun hi khapte na jaen roz-o-shab mein ham

kabhi to bat be mausam bhi ki jae

ye tum kis ke liye jalte ho goshon mein

chalo chhat par sarak tak raushni jae