بدن کو اپنی بساط تک تو پسارنا تھا

بدن کو اپنی بساط تک تو پسارنا تھا

ہر ایک شے کو لہو کے رستے گزارنا تھا

جدھر فصیلوں نے اس کو موڑا یہ مڑ گئی ہے

ہوا کی موجوں میں کوئی کوندا اتارنا تھا

تو کیا سبب سات پانیوں کو نہ پی سکے ہم

خود اپنا ڈوبا ہوا جزیرہ ابھارنا تھا

میں اپنے اندر سمٹ گیا ایک لمحہ بن کر

کہیں تو اپنے جنم کا منظر گزارنا تھا

تم آ گئے کیوں وجود کی یہ برات لے کر

ہمیں تو اپنی رگوں میں شمشان اتارنا تھا

یہاں سے کٹ کر وہ جا کے جنگل میں سو گئی ہیں

اسی بہانے ہواؤں کو کھیل ہارنا تھا

نہ برج ٹوٹے نہ آنکھ جھپکی نہ وقت بیتا

نہ جانے کیا کچھ بسرنا تھا کیا بسارنا تھا

badan ko apni bisat tak to pasarna tha

har ek shai ko lahu ke raste guzarna tha

jidhar fasilon ne us ko mora ye mur gai hai

hawa ki maujon mein koi kaunda utarna tha

to kya sabab sat paniyon ko na pi sake ham

khud apna duba hua jazira ubharna tha

main apne andar simat gaya ek lamha ban kar

kahin to apne janam ka manzar guzarna tha

tum a gae kyun wajud ki ye barat le kar

hamen to apni ragon mein shamshan utarna tha

yahan se kat kar wo ja ke jangal mein so gai hain

isi bahane hawaon ko khel harna tha

na burj tute na ankh jhapki na waqt bita

na jane kya kuchh basarna tha kya bisarna tha