غرور و ناز و تکبر کے دن تو کب کے گئے

غرور و ناز و تکبر کے دن تو کب کے گئے

ظہیرؔ اب وہ زمانے حسب نسب کے گئے

بہت غرور گلستاں میں تھا گلابوں کو

تمہیں جو دیکھا تو ہوش و حواس سب کے گئے

مچا ہے شور خزاں کا ہے رخ اسی جانب

اگر یہ سچ ہے تو سمجھو کہ ہم بھی اب کے گئے

خلوص سے نہ سہی رسم ہی نبھانے کو

تم آ گئے ہو تو شکوے تمام لب کے گئے

وہ چاندنی وہ تبسم وہ پیار کی باتیں

ہوئی سحر تو وہ منظر تمام شب کے گئے

کبھی تو حلقۂ زنجیر یاس بھی ٹوٹے

کبھی تو لوٹ کے آئیں وہ لمحے جب کے گئے

ghurur-o-naz-o-takabbur ke din to kab ke gae

zahir ab wo zamane hasab nasab ke gae

bahut ghurur-e-gulistan mein tha gulabon ko

tumhen jo dekha to hosh-o-hawas sab ke gae

macha hai shor khizan ka hai rukh usi janib

agar ye sach hai to samjho ke ham bhi ab ke gae

khulus se na sahi rasm hi nibhane ko

tum a gae ho to shikwe tamam lab ke gae

wo chandni wo tabassum wo pyar ki baten

hui sahar to wo manzar tamam shab ke gae

kabhi to halqa-e-zanjir yas bhi tute

kabhi to laut ke aen wo lamhe jab ke gae