حوصلے جینے کے دل کو بے بسی دیتی رہی

حوصلے جینے کے دل کو بے بسی دیتی رہی

آرزو پژمردگی کو تازگی دیتی رہی

میں نے اپنے آگے ان کو سر اٹھانے نہ دیا

حادثوں کو مات میری سرکشی دیتی رہی

رہ گیا میں ناز برداری میں اس کی عمر بھر

زندگی مجھ کو فریب زندگی دیتی رہی

خون دل دیتا رہا میں شمع ہستی کو سدا

اور یہ اوروں کو اپنی روشنی دیتی رہی

اک طرف دیتی رہی مجھ کو اجل اپنا پیام

اک طرف آواز مجھ کو زندگی دیتی رہی

گر پڑے قدموں پہ آ کے تاج شاہوں کے ظہیرؔ

یہ وقار اور شان عظمت سادگی دیتی رہی

hausle jine ke dil ko be basi deti rahi

arzu pazhmurdagi ko tazgi deti rahi

main ne apne age un ko sar uthane na diya

hadson ko mat meri sarkashi deti rahi

rah gaya main naz bardari mein us ki umr bhar

zindagi mujh ko fareb-e-zindagi deti rahi

khun-e-dil deta raha main sham-e-hasti ko sada

aur ye auron ko apni raushni deti rahi

ik taraf deti rahi mujh ko ajal apna payam

ik taraf awaz mujh ko zindagi deti rahi

gir pare qadmon pe a ke taj shahon ke zahir

ye waqar aur shan-e-azmat sadgi deti rahi