نئی محبت کی داستانیں رقم کریں گے تو ہم کریں گے

دلوں میں بڑھتی ہوئی خلیجوں کو کم کریں گے تو ہم کریں گے

ہم اپنی نیندوں کی ڈوریوں تک کو تیرے پلو سے باندھ لیں گے

یوں اپنے خوابوں کو تیرے خوابوں میں ضم کریں گے تو ہم کریں گے

چلو یہ مل کے کریں ارادہ کریں خدا سے یہ مل کے وعدہ

زمین اقدس پہ غم کے ماروں کا غم کریں گے تو ہم کریں گے

وہ جن کے سینوں میں دل نہیں ہے انہیں سے ترغیب مل رہی ہے

اب ایسے سینوں پہ دھڑکنوں کا جو دم کریں گے تو ہم کریں گے

جہاں میں جو کچھ ظہور میں ہے سبھی ہمارے حضور میں ہے

یہ دین و دنیا یہ عشق و مستی بہم کریں گے تو ہم کریں گے

خدا ہے شاہد ندیم ناجدؔ یہ ہے مرے عشق کا تقاضا

تمہیں یہاں پہ بھی اور وہاں بھی صنم کریں گے تو ہم کریں گے