چاہتوں کو نت نئے انداز سے دیکھا کرو

چاہتوں کو نت نئے انداز سے دیکھا کرو

وصل کی راحت میں فرقت کا سماں لکھا کرو

کیا پتہ ان کی بھی لگ جائے کوئی قیمت کہیں

سنگریزوں کو بھی ہیروں کی طرح پرکھا کرو

ذات کے صحرا میں کر پاؤ گے کیا اپنی تلاش

عمر بھر پیچھے سراب زیست کے بھاگا کرو

اک ہوائے تند کا جھونکا اڑا لے جائے گا

ریت کے سینے پہ کوئی نام مت لکھا کرو

تم بہت گھبرا گئے گھر کی ویرانی سے فیضؔ

اب ہجوم شہر میں تنہائیاں ڈھونڈا کرو

chahaton ko nit nae andaz se dekha karo

wasl ki rahat mein furqat ka saman likha karo

kya pata un ki bhi lag jae koi qimat kahin

sangrezon ko bhi hiron ki tarah parkha karo

zat ke sahra mein kar paoge kya apni talash

umr bhar pichhe sarab-e-zist ke bhaga karo

ik hawa-e-tund ka jhonka ura le jaega

ret ke sine pe koi nam mat likha karo

tum bahut ghabra gae ghar ki wirani se faiz

ab hujum-e-shahr mein tanhaiyan dhunda karo