Arooz is now on the App Store, for iPhone and iPad. Download →

All poetry

ناز کر ناز کہ یہ ناز جدا ہے سب سے

Ummeed Fazli (1923–2005)

ناز کر ناز کہ یہ ناز جدا ہے سب سے

میرا لہجہ مری آواز جدا ہے سب سے

جز محبت کسے معلوم کہ وہ چشم حیا

بات تو کرتی ہے انداز جدا ہے سب سے

جس کو بھی مار دیا زندۂ جاوید کیا

حرف حق تیرا یہ اعجاز جدا ہے سب سے

دیکھنا کون ہے کیا اس کو نہیں جان عزیز

سر دربار اک آواز جدا ہے سب سے

ٹوٹ جاتا ہے تو سر اور بھی لو دیتے ہیں

دل جسے کہتے ہیں وہ ساز جدا ہے سب سے

سوچ کر دام بچھانا ذرا اے موج ہوا

میرے انکار کی پرواز جدا ہے سب سے

نشۂ دہر و قیامت کا تو کیا ذکر امیدؔ

وہ مرا سرو سرافراز جدا ہے سب سے