وہ خواب ہی سہی پیش نظر تو اب بھی ہے

وہ خواب ہی سہی پیش نظر تو اب بھی ہے

بچھڑنے والا شریک سفر تو اب بھی ہے

زباں بریدہ سہی میں خزاں گزیدہ سہی

ہرا بھرا مرا زخم ہنر تو اب بھی ہے

سنا تھا ہم نے کہ موسم بدل گئے ہیں مگر

زمیں سے فاصلۂ ابر تر تو اب بھی ہے

ہماری در بدری پر نہ جائیے کہ ہمیں

شعور سایۂ دیوار و در تو اب بھی ہے

ہوس کے دور میں ممنون یاد یار ہیں ہم

کہ یاد یار دلوں کی سپر تو اب بھی ہے

کہانیاں ہیں اگر معتبر تو پھر اک شخص

کہانیوں کی طرح معتبر تو اب بھی ہے

ہزار کھینچ لے سورج حصار ابر مگر

کرن کرن پہ گرفت نظر تو اب بھی ہے

سمندروں سے زمینوں کو خوف کیا کہ امید

نمو پزیر زمین ہنر تو اب بھی ہے

مگر یہ کون بدلتی ہوئی رتوں سے کہے

شجر میں سایہ نہیں ہے شجر تو اب بھی ہے

wo khwab hi sahi pesh-e-nazar to ab bhi hai

bichharne wala sharik-e-safar to ab bhi hai

zaban burida sahi main khizan gazida sahi

hara bhara mira zakhm-e-hunar to ab bhi hai

suna tha ham ne ke mausam badal gae hain magar

zamin se fasla-e-abr-e-tar to ab bhi hai

hamari dar badri par na jaiye ke hamen

shuur-e-saya-e-diwar-o-dar to ab bhi hai

hawas ke daur mein mamnun yad-e-yar hain ham

ke yad-e-yar dilon ki sipar to ab bhi hai

kahaniyan hain agar motabar to phir ik shakhs

kahaniyon ki tarah motabar to ab bhi hai

hazar khinch le suraj hisar-e-abr magar

kiran kiran pe giraft-e-nazar to ab bhi hai

samundaron se zaminon ko khauf kya ke umid

numu pazer zamin-e-hunar to ab bhi hai

magar ye kaun badalti hui ruton se kahe

shajar mein saya nahin hai shajar to ab bhi hai