ہائے اک شخص جسے ہم نے بھلایا بھی نہیں

ہائے اک شخص جسے ہم نے بھلایا بھی نہیں

یاد آنے کی طرح یاد وہ آیا بھی نہیں

جانے کس موڑ پہ لے آئی ہمیں تیری طلب

سر پہ سورج بھی نہیں راہ میں سایا بھی نہیں

وجہ رسوائی احساس ہوا ہے کیا کیا

ہائے وہ لفظ جو لب تک مرے آیا بھی نہیں

اے محبت یہ ستم کیا کہ جدا ہوں خود سے

کوئی ایسا مرے نزدیک تو آیا بھی نہیں

یا ہمیں زلف کے سائے ہی میں نیند آتی تھی

یا میسر کسی دیوار کا سایا بھی نہیں

بارہا دل تری قربت سے دھڑک اٹھا ہے

گو ابھی وقت محبت میں وہ آیا بھی نہیں

آپ اس شخص کو کیا کہیے کہ جس نے امیدؔ

غم دیا غم کو دل آزار بنایا بھی نہیں

hae ik shakhs jise ham ne bhulaya bhi nahin

yad ane ki tarah yad wo aya bhi nahin

jane kis mor pe le ai hamen teri talab

sar pe suraj bhi nahin rah mein saya bhi nahin

wajh-e-ruswai-e-ehsas hua hai kya kiya

hae wo lafz jo lab tak mire aya bhi nahin

ai mohabbat ye sitam kya ke juda hun khud se

koi aisa mire nazdik to aya bhi nahin

ya hamen zulf ke sae hi mein nind ati thi

ya muyassar kisi diwar ka saya bhi nahin

barha dil tiri qurbat se dharak utha hai

go abhi waqt-e-mohabbat mein wo aya bhi nahin

ap us shakhs ko kya kahiye ke jis ne ummid

gham diya gham ko dil azar banaya bhi nahin