سبز حکایت سرخ کہانی

سبز حکایت سرخ کہانی

تیرے آنچل کی مہمانی

سہج سہج اس حسن کا چلنا

اس پہ اندھی شب طوفانی

اک مصرع وہ جسم اکہرا

دوجا میرے لب دہقانی

جلد سنہری ہونٹ پیازی

اس پہ خواہش کی ارزانی

بالوں کا گھنگھور اندھیرا

ابھری اینٹوں کی حیرانی

پنڈلی سے ٹکراتی پنڈلی

اترن کی فتنہ سامانی

اک لڑکی کے دوپٹے پر

ہم نے اک رت ہے پھیلانی

انگوروں کی بیل سے شب بھر

باتیں کرتی ہے ویرانی

پشت یہ نیل پڑے ہوں جیسے

جلتا ہے پاتال میں پانی

دو جسموں کی آنکھ انوکھی

خواب اور خواہش کی یک جانی

اوس کے بھالے روح کے چھالے

چھالے سا اک دل سیلانی

کیسے دل مسلے جاتا ہے

گدلا دن کوڑی یرقانی

اک تعویذ کا سبزہ دل پر

ایک حکایت رات کی رانی

دیکھ دلاسوں والا کاسہ

عشق کی دمڑی کی حیرانی

ساون کے چھجے پر عامرؔ

اک بھی بوند نہیں بارانی

sabz hikayat surkh kahani

tere anchal ki mehmani

sahj sahj us husn ka chalna

us pe andhi shab tufani

ik misra wo jism ikahra

doja mere lab dehqani

jald sunahri hont piyazi

us pe khwahish ki arzani

balon ka ghanghor andhera

ubhri inton ki hairani

pindli se takrati pindli

utran ki fitna samani

ik larki ke dupatte par

ham ne ik rut hai phailani

anguron ki bel se shab bhar

baten karti hai wirani

pusht ye nil pare hun jaise

jalta hai patal mein pani

do jismon ki ankh anokhi

khwab aur khwahish ki yak jani

os ke bhale ruh ke chhale

chhale sa ik dil sailani

kaise dil masle jata hai

gadla din kauri yarqani

ik taawiz ka sabza dil par

ek hikayat rat ki rani

dekh dilason wala kasa

ishq ki damri ki hairani

sawan ke chhije par amir

ik bhi bund nahin barani