گلے سے دیر تلک لگ کے روئیں ابر و سحاب

گلے سے دیر تلک لگ کے روئیں ابر و سحاب

ہٹا دیے ہیں زمان و مکاں کے ہم نے حجاب

لحد کی مٹی کی تقدیر کی امان میں دوں

سفید لٹھے میں کفنا کے سرخ شاخ گلاب

میں آسمان ترے جسم پہ بچھا دیتا

مگر یہ نیل میں چادر بنی نہیں کمخواب

ترا وہ راتوں کو اٹھ کر سسک سسک رونا

لہو میں نیند کی ٹیسیں پلک پہ عجز کے خواب

ترے جلائے دیوں میں بھڑکتی آگ کا پھیر

زمیں کی رحل پہ رکھے نہ روشنی کی کتاب

ہوا بہشت کے باغوں کی زلف زلف پھرے

تری لحد ترے بالیں کے گرد جوئے شراب

کمان کھینچ زمانے کی سوئے سینہ زناں

اے فرق ناز گلے سے اتار طوق غیاب

میں ایک یخ زدہ ماتھے کو چوم کر دم صبح

تری زمینوں سے گزروں گا اے جہان خراب

مشقتی ہیں ترے کاخ و کوئے ہجر کے ہم

اے کار خانہ افلاک و خاک و آب و سراب

یہ تنگ و تار گڑھا نور سے بھرے عامرؔ

سدا رہے تیرے حجرے میں ہالۂ ماہتاب

gale se der talak lag ke roen abr-o-sahab

hata diye hain zaman-o-makan ke ham ne hijab

lahad ki mitti ki taqdir ki aman mein dun

safed latthe mein kafna ke surkh shakh-e-gulab

main asman tire jism pe bichha deta

magar ye nil mein chadar bani nahin kamkhwab

tira wo raton ko uth kar sisak sisak rona

lahu mein nind ki tisen palak pe ijz ke khwab

tire jalae diyon mein bharakti ag ka pher

zamin ki rahal pe rakhe na raushni ki kitab

hawa bahisht ke baghon ki zulf zulf phire

tiri lahad tire balin ke gard ju-e-sharab

kaman khinch zamane ki su-e-sina zanan

ai farq-e-naz gale se utar tauq ghiyab

main ek yakh zada mathe ko chum kar dam-e-subh

tiri zaminon se guzrunga ai jahan-e-kharab

mashaqqati hain tire kakh-o-ku-e-hijr ke ham

ai kar khana aflak-o-khak-o-ab-o-sarab

ye tang-o-tar garha nur se bhare amir

sada rahe tere hujre mein hala-e-mahtab