سسکیوں ہچکیوں آہوں کی فراوانی میں

سسکیوں ہچکیوں آہوں کی فراوانی میں

الجھنیں کتنی ہیں اس عشق کی آسانی میں

یہ ترے بالوں کا تالاب کی تہ کو چھونا

حالت خواب میں یا عالم عریانی میں

بے حجابانہ کسی لہر کا تجھ تک آنہ

پھر ترے جسم کا بہہ جانا گھنے پانی میں

کہکشاؤں کا غزالوں کا غزل زادوں کا

دور و نزدیک سے آنا تری مہمانی میں

رات کا جھکنا تری پشت پہ دل داری کو

باغ کے پیڑوں کا آ جانا رجز خوانی میں

بام و در دیکھتے جاتے ہیں کھڑے سکتے میں

اک ستارے کا توارد تری پیشانی میں

مرمریں انگلیاں اک دل پہ لکھیں حال حنا

پھول آواز کا کھل جائے پشیمانی میں

چاند مخروطی ابھاروں پہ شعاعیں پھینکے

اس قدر محو تجھے دیکھ کے حیرانی میں

سایۂ ثابت و سیار کے ہالے میں چلوں

اور جہانوں میں رہوں تیری نگہبانی میں

siskiyon hichkiyon ahon ki farawani mein

uljhanen kitni hain is ishq ki asani mein

ye tire balon ka talab ki tah ko chhuna

halat-e-khwab mein ya alam-e-uryani mein

be hijabana kisi lahr ka tujh tak ana

phir tire jism ka bah jana ghane pani mein

kekushaon ka ghazalon ka ghazal zadon ka

dur-o-nazdik se ana tiri mehmani mein

rat ka jhukna tiri pusht pe dil dari ko

bagh ke peron ka a jana rajaz khwani mein

bam-o-dar dekhte jate hain khare sakte mein

ik sitare ka tawarud tiri peshani mein

marmarin ungliyan ik dil pe likhen hal-e-hina

phul awaz ka khul jae pashemani mein

chand makhruti ubharon pe shuaen phenke

is qadar mahw tujhe dekh ke hairani mein

saya-e-sabit-o-sayyar ke hale mein chalun

aur jahanon mein rahun teri nigahbani mein