اک وظیفہ ہے کسی درد کا دہرایا ہوا

اک وظیفہ ہے کسی درد کا دہرایا ہوا

جس کی زد میں ہے پہاڑوں کا دھواں آیا ہوا

یہ ترے عشق کی میقات یہ ہونی کی ادا

دھوپ کے شیشے میں اک خواب سا پھیلایا ہوا

باندھ لیتے ہیں گرہ میں اسی منظر کی دھنک

ہم نے مہمان کو کچھ دیر ہے ٹھہرایا ہوا

طائرو ابر و ہوا بھی ہیں اسی الجھن میں

کیسے دو ہونٹوں نے اک باغ ہے دہکایا ہوا

چھید ہیں عمر کی پوشاک پہ تنہائی کے

خوش نما قریوں میں ہوں آپ سے اکتایا ہوا

رات آتی ہے تو رکھ دیتی ہے پھاہا دل پر

ورنہ اس دشت کا ہر پیڑ ہے زخمایا ہوا

ہڈیاں جوڑ کے ترتیب سے اس نے عامرؔ

خواب کا لٹھا ہے اس روح کو پہنایا ہوا

ik wazifa hai kisi dard ka dohraya hua

jis ki zad mein hai paharon ka dhuan aya hua

ye tire ishq ki meqat ye honi ki ada

dhup ke shishe mein ik khwab sa phailaya hua

bandh lete hain girah mein isi manzar ki dhanak

ham ne mehman ko kuchh der hai thahraya hua

tairo abr-o-hawa bhi hain isi uljhan mein

kaise do honton ne ik bagh hai dahkaya hua

chhed hain umr ki poshak pe tanhai ke

khush numa quriyon mein hun ap se uktaya hua

rat ati hai to rakh deti hai phaha dil par

warna is dasht ka har per hai zakhmaya hua

haddiyan jor ke tartib se us ne amir

khwab ka lattha hai is ruh ko pahnaya hua