بے وفا وعدہ شکن اور ستم گر نکلا

بے وفا وعدہ شکن اور ستم گر نکلا

میں نے سمجھا تھا جسے پھول وہ پتھر نکلا

وہ تو لگتا تھا ہمیں شہر کا پاگل کوئی

غور سے جب اسے دیکھا تو پیمبر نکلا

قیس ہمسایہ تھا میرا یہ مجھے یاد نہ تھا

ڈھونڈتے ڈھونڈتے صحرا میں مرا گھر نکلا

سر جھکایا تھا اسے جان کے اپنے سے بڑا

وہ بھی افسوس مرے قد کے برابر نکلا

میرے مالک مرے احساس کو لے لے مجھ سے

میرا احساس تو میرے لئے خنجر نکلا

تشنہ لب پیاس سے دم توڑ رہا تھا جس دم

میری آنکھوں سے سمندر کا سمندر نکلا

ایک لمحے میں پتہ چل گیا اپنا مجھ کو

جب مرا سایہ مرے جسم سے بڑھ کر نکلا

ہو گئے مجھ سے خفا شہر بدن کے اعضا

میرا باغی مری بستی کا ہر اک گھر نکلا

کس کو الزام دوں بربادئ دل کا میں عمرؔ

میرا دشمن تو مرا خود ہی مقدر نکلا

be wafa waada shikan aur sitam gar nikla

main ne samjha tha jise phul wo patthar nikla

wo to lagta tha hamen shahr ka pagal koi

ghaur se jab use dekha to payambar nikla

qais hamsaya tha mera ye mujhe yad na tha

dhundte dhundte sahra mein mira ghar nikla

sar jhukaya tha use jan ke apne se bara

wo bhi afsos mire qad ke barabar nikla

mere malik mire ehsas ko le le mujh se

mera ehsas to mere liye khanjar nikla

tishna lab pyas se dam tor raha tha jis dam

meri ankhon se samundar ka samundar nikla

ek lamhe mein pata chal gaya apna mujh ko

jab mira saya mire jism se barh kar nikla

ho gae mujh se khafa shahr badan ke aaza

mera baghi miri basti ka har ik ghar nikla

kis ko ilzam dun barbadi-e-dil ka main umar

mera dushman to mira khud hi muqaddar nikla