اب تو دراز ایک بھی دست دعا نہیں

اب تو دراز ایک بھی دست دعا نہیں

سب ہیں خدا یہاں پہ کوئی نا خدا نہیں

قدریں بدل چکی ہیں جنون وفا کی اب

شرط وفا بدل دو کوئی بے وفا نہیں

دیکھو گلی میں تم کو صدا دے رہا ہے کون

آواز دینے والے سبھی تو گدا نہیں

اقبالؔ بن کے شکوہ کرو تو ہے بات کچھ

اس دور میں طریقۂ حالیؔ روا نہیں

میں زندگی کے شہر میں نغموں کی جان تھا

صحرا کا اب سکوت ہوں کوئی صدا نہیں

اب لے چلو عمرؔ کسی میخانے میں مجھے

دیر و حرم میں میرے مرض کی دوا نہیں

ab to daraz ek bhi dast-e-dua nahin

sab hain khuda yahan pe koi na khuda nahin

qadren badal chuki hain junun-e-wafa ki ab

shart-e-wafa badal do koi be wafa nahin

dekho gali mein tum ko sada de raha hai kaun

awaz dene wale sabhi to gada nahin

iqbal ban ke shikwa karo to hai bat kuchh

is daur mein tariqa-e-hali rawa nahin

main zindagi ke shahr mein naghmon ki jan tha

sahra ka ab sukut hun koi sada nahin

ab le chalo umar kisi maikhane mein mujhe

dair-o-haram mein mere maraz ki dawa nahin