عجیب خواب تھا ہم باغ میں کھڑے ہوئے تھے

عجیب خواب تھا ہم باغ میں کھڑے ہوئے تھے

ہمارے سامنے پھولوں کے سر پڑے ہوئے تھے

برہنہ تتلیاں رقصاں تھیں عریاں شاخوں پر

زمیں میں سارے شجر شرم سے گڑے ہوئے تھے

تمام پات تھے نیلے بزرگ برگد کے

اسی کو ڈسنے سے سانپوں کے پھن بڑے ہوئے تھے

ضعیف پیڑ تھے بوڑھی ہوا سے شرمندہ

جواں پرندے کسی بات پر اڑے ہوئے تھے

نہ کوئی نغمۂ بلبل نہ کوئی نغمۂ گل

خدائے صبح سے سب خوش گلو لڑے ہوئے تھے

وہیں پہ سامنے واصفؔ تھا ایک قبرستاں

جہاں یہاں وہاں سب نامور سڑے ہوئے تھے

پھر ایک قبر ہوئی شق تو اس میں تھے دو دل

اور ان دلوں میں محبت کے نگ جڑے ہوئے تھے

ajib khwab tha ham bagh mein khare hue the

hamare samne phulon ke sar pare hue the

barahna titliyan raqsan thin uryan shakhon par

zamin mein sare shajar sharm se gare hue the

tamam pat the nile buzurg bargad ke

usi ko dasne se sanpon ke phan bare hue the

zaif per the burhi hawa se sharminda

jawan parinde kisi bat par ure hue the

na koi naghma-e-bulbul na koi naghma-e-gul

khuda-e-subh se sab khush galo lare hue the

wahin pe samne wasaf tha ek qabristan

jahan yahan wahan sab namwar sare hue the

phir ek qabr hui shaqq to is mein the do dil

aur in dilon mein mohabbat ke nag jure hue the